ياعينى عليك يا بلادي - زجل للدكتور عبدالله منصور (شباس عمير)

ياعينى عليك يا بلادي

بقيتي في وادي  وناسك في وادي

والعين بتدمع ؛ماحدش بيسمع..

صوت أي عاقل  مهما ينادى!!

*************************

معاول  في  الأيادي

بتوجهها  الأعادي

بالدولارات والدسايس

؛ومظاهرات في تمادى !

************************

شك في صدر  الشباب

..  وعقولنا  في غياب ؛

واتهامات في الهواء ؛

والرؤية بقت ضباب !

************************

الأخوان قالوا لن..وكان

وابتدى  سب وعتاب

جه سليمان .. ولّعت؛

وجه فلان وطلع كداب؟!

************************

مين فتح للفوضى باب؛

م الفلول أو م الصحاب؛

من هو اللهو  الخفي ؟؟

دا السؤال؛ومالوش جواب!!!

****************************

انقسام وشقاق  يعل

وفلان ثوري ؛وفلان فِـل؛

وحرب حناجر وحرب خناجر

ومولوتوف وخوف خلوها خل

وناشط سياسي كلامه ممل

ودا انتهازي  ودا مستغل

ودا ليبرالي..  ودا إسلامي

ودا حزب كنبة ،ودا مستقل!

****************************

وسبوا العسكر..؛ وسبوا الوزارة

ومجلس شعب معلّى الحرارة

ودعوات في جامع بتخدم مطامع

ودا يقول خلافة ودا يقول إمارة!!

****************************

قوللى يامصرى إيه العبارة؟

فين الانتماء؟..وفين الحضارة!

يا أي مصري..النيل جوه دمه

تعالوا  بحكمة   نلافى الخسارة!