يعنى إيه فلول ؟؟ - زجل حلمنتيشى للدكتور عبدالله منصور

يعنى إيه فلول ؟ ... لوكنت تعرف قول

أنا لو كنت اعرف ... كنت أقول على طول

هل كل اللي عملوا في بلادي في الماضي

هانسميهم فلول ؟ ... دا شئ ماهوش معقول !

...........................................

كنا موظفين  في حكومة حزب غول

جميع مصالحنا عنده ، الصاحي والمسطول

وكان واخدنا في حضنه ، وبيرضعنا فول

... يبقى إحنا م الفلول ؟!

دا الموجه لو عاليه ... ،

هاتلاقى فيه غرقان وفيه عايم ، وفيه مبلول

مش كل الناس فلول ؟!

............................................

ياناس بلاش الغل ... مش اى واحد فل

الفِل هو المُدان ... فهل نُدين الكل ؟

دا ياما فيه قدامى شرفا ، وشافوا الذل

وكتير تفانى في عطائه في الظل ولا يوم ملّ

ليه كل واحد فاضي ... يعملى فيها قاضى

ويقول ع  الفـُـل   فِـل ؟!

...........................................

كفايه جدل بيزانطى ، وكفايه سفسطه

كفايانا كتر كلام ... مشاكلنا مرطرطه

والفتنه مش بتنام ... والناس متمرمطه

عايزين عمل بإخلاص ، يحي الأمل ياناس

، ويا ... متسلقين .... كفايه شعبطه !!