ارتفاع أسعار العلاج الحر - زجل للدكتور – عبدالله منصور ( شباس عمير )

قسم العلاج الحر في الصحة نظامه مر

وتعليماته الصريحة لابتنفع ولا بتضر

كل الرقابة .. على المظهر وع   التجهيز

،أما بقى الأسعار يادكتور فأنت حر !

************************

مستشفياتنا الخصوصي لها نظام بالنجوم

الخدمة هاى .. وفخامة ، بس ادفع المعلوم

والعملية أم ألف بتكلفك عشرة

والطب بقى بيزنس ..  والضمير نام نوم

************************

دكتور أستاذ في جامعه بس له عيادة

كشفه وصل ربعميه ، وميتين جنيه إعادة

توصله يطلب فحوص .. تحاليل وأشيعه

يعنى تعوز على الفيزيتا ألف جنيه وزيادة !

************************

ياعينى ع العيان لو غلبان في بلادنا

بيقول كشفنا ببلاش مفيش علاج فادنا

ولو نبيع قمحنا ، وزادنا ، وزوادنا

يدوب ندبق تمن كشف للأستاذ يااسيادنا

************************

اللي بيقع للدكاترة .. يبيع عزال بيته

ولو موظف   يكع حوافزه وماهيته

ولو فلاح يبيع له نعجة أو عجلة ،

ولو المرض عضال .. يمكن يبيع غيطه

***********************

اقرب مثال شفناه جارتنا ستوته

قالوا دى حامل .. جيرانها فقعوا زرغوته

ساعة الولادة .. الداية فشلت مساعيها ،

بعتت لجوزها اللي كان واقف يبيع قوطة

***********************

قالت لجوزها لأقرب حكيم توليد ودوها

دى ولادة متعسرة .. وبلغوا أبوها

قول حملوها على الكارو ، وراحوا بيها

قال الطبيب .. قيصريه ، وفورا .. نعملوها

********************

فاقت من البنج ، والنونو ماشالله عليه

وجوزها شكر الطبيب ، سأله حسابنا إيه؟

فقال : حساب البنج والطلبات عليَّ أنا ،

والباقي بعد الخصم قول .. ألفين جنيه !

********************

جوز الولية كأنك ضربته برصاصة

سورق ياعينى ، وقع .. والأرض متعاصه

حماه فوقه ، ونفضه ، وقال له ماتخافشى

دهب حماتك معايا .. همه الحكما قناصة !