قال إيه بنحب مصر ! زجل للدكتور عبدالله منصور ( شباس عمير )

كلنا في الهم سوا

بنشموا نفس الهوى

وعلاجنا نفس الدوا

وبدم جدى وجدك

تراب بلدنا اتروى

بنحلم باستقرار

وبخير يعم الديار

ونهاتى ليل ونهار:

بنحبك يامصر .. بنحبك يامصر

هل كده نبقوا الثوار؟

كلام وكلام وكلام

وزاد عليه الانقسام

والفرقة والملام

.. مزايدات في رواج

وتدنى في الإنتاج

وشعارات والسلام

الكل عايز مصلحته

وعايز عجينه لمطرحته،

وهو قاعد على راحته

ولا حد بدر القمح

ولا حد .. ورانا فلاحته

فوضى اتعملتلنا مخصوص

وكتر انتهازيين ولصوص

وغيطان فيها الطوب مرصوص

والوقفات الاحتجاجية

وظروفنا مش اللي هي

.. أنانيه م الرأس للعصعوص

.. قال وبنحلم باستقرار

وبخير يعم الدار

ونغنى ليل ونهار:

تحيا الثورة وتحيا مصر

نبنى ونعمر مصر!!

ييجى منين العمار ؟

ومين بدا المشوار ؟؟

مين ضحى علشان بلدنا

يا خلق هووه يا أسيادنا

صحوة ضمير تنجدنا!

إيه اللي يحيى الأمل

غير العرق والعمل ؟!

وقدوه بتقودنا

.. نقلدوا جدودنا

بشغل ها يفيدنا

ونحفظوا حدودنا

الحب لو ساد

بيننا تعلى البلاد

ونحققوا مرادنا !!