أحلام الفتى الحاير - زجل للدكتور / عبدالله منصور

مادام مفيش وظيفة

يبقى مفيش طعام

ومادام مفيش فلوس

يبقى أحسن ننام

واللي لازمنا وناقصنا

نشوفه ف الأحلام

............................

حلمت قال إني باخطب

وابو العروسة بعت لي

وقال لي لو ناوي تخطب

ومادام أنت اللي جيت لي

أنت كفايه علينا...

حتى العروسة قالت لي :

..............................

كفايه الحب يجْمَعنا

واصغر عش هيساعنا

ونص رغيف يشبعنا

ونشرب ميه لو جعنا

وطالما فيه رضا بينا

هيبقى للحياة معنى

..........................

وحلمت بشقه واسعة

ع النيل باتنين تراس

واتنين حمام وهول

وجنينه بالحراس

صحيت م النوم حكيته

قالوا دا م الإفلاس

.........................

وف حلم بقى أتغنيت

ومعايا فيزا كارد

وباروح بقى الفنادق

راكب عربية فورد

فندق خمس نجوم..

وإقامة إيه؟ فول بورد

بس أمى جات صحتنى

قالت لي ليه تتعرى

يابنى تموت م البرد